Kocha Mkuu wa Yanga, Miguel Gamondi, amewasifu wachezaji wake wanavyopambana mazoezini ili kuhakikisha wanakuwa imara na tayari kupata ushindi katika michezo yao iliyoko mbele
Gamondi amesema hata katika michezo ambayo hawakupata ushindi, nyota wake hupambana na kinachowazuia ni suala la bahati
"Ukiangalia wachezaji wanavyocheza unaona kabisa wanavyojitoa kwa ajili ya timu yao, tunapokosa ushindi tunakuwa tumekosa bahati tu lakini wachezaji wanakuwa wamefanya kazi yao kwa uhakika," alisema
Gamondi amebainisha kuwa kila wanapokuwa kwenye uwanja wa mazoezi wanatumia muda mwingi kusisitiza kuhusu hali ya upambanaji ili kupata matokeo mazuri kwa ajili ya kutimiza malengo
Akizungumzia mchezo unaofuata ligi kuu dhidi ya Singida FG ambao utapigwa kesho Jumapili katika uwanja wa CCM Kirumba, Gamondi amesema hatarajii mechi hiyo kuwa nyepesi
"Tunatambua kila timu ipo katika mashindano hivyo imejiandaa vizuri, utakuwa mchezo mgumu lakini tunahitaji ushindi kuhakikisha tunatetea taji la Ligi Kuu Tanzania Bara," Gamondi alisema
Katika msimamo wa Ligi Kuu Tanzania Bara, Yanga inaongoza ikiwa na pointi 52 zilizovuna katika michezo 20 wakati Singida Fountain Gate iko nafasi ya saba, imejikusanyia pointi 24 baada ya kushuka dimbani mara 21. Yanga ndio mabingwa watetezi wa Ligi Kuu Tanzania Bara na mashindano ya Kombe la FA
