Kocha Mkuu wa Yanga Miguel Gamondi amesema timu iko tayari kwa mchezo wa mkondo wa pili robo fainali ya ligi ya mabingwa dhidi ya Mamelodi Sundowns utakaopigwa uwanja wa Loftus kesho Ijumaa
Akizungumza katika Mkutano na Wanahabari mapema leo, Gamondi alisema kila timu ina nafasi sawa ya kutinga hatua ya nusu fainali
Amesema wanatambua mchezo huo utakuwa mgumu lakini hawako Afrika Kusini kutembea, watapambana kuwania matokeo ya kuwapeleka nusu fainali
"Utakuwa mchezo mgumu lakini ni lazima baada ya dakika 90 kuwe na mshindi mmoja. Mpaka sasa mchezo uko 50/50 bado kila timu ina nafasi hivyo tuko hapa kuhakikisha tunapambana kupata matokeo mazuri," alisema Gamondi
Aidha kocha huyo raia wa Argentina amesema hawatishwi na historia ya Mamelodi Sundowns kwani anakiamini kikosi chake kina wachezaji wazoefu na wapambanaji
"Siwaandai wachezaji wangu kwa ajili ya historia ya Mamelodi, naandaa timu yangu kutokana na dakika 90 zinazokuja. Tunaamini kazi tuliyofanya kwenye Uwanja wa mazoezi, tuna imani na wachezaji na Mashabiki wetu, haitakuwa rahisi kwetu na kwao pia"
"Tuna Wachezaji wenye uzoefu wenye sifa ya kupambana, msimu uliopita kwenye Fainali ya Kombe la Shirikisho walipoteza nyumbani lakini wote mnajua kilichotokea walipokwenda ugenini, kesho ni mchezo tofauti lakini watapambana tena kwa ajili ya mashabiki wetu"
Akizungumzia hali za wachezaji waliokuwa majeruhi, Gamondi alisema kuna nafasi ya baadhi yao kurejea lakini hatma yao itafahamika baada ya mazoezi ya mwisho leo
"Tunasubiri kuona itakavyokuwa leo kwenye mazoezi ya mwisho, tunaweza kumpata mchezaji katika wale waliokuwa majeruhi. Ni kweli tunaiwaza nusu fainali ya CAF lakini tunajali pia na usalama wa afya za wachezaji wetu pia. Young Africans haichezi mashindano haya peke yake"
