Achana na mkwanja mrefu ambao wachezaji wa Yanga leo wataondoka nao kama wataibuka na ushindi dhidi ya CR Belouizdad na kufanikiwa kutinga robo fainali ya michuano ya ligi ya mabingwa barani Afrika, hii itakuwa mechi ya heshima na kuwatangaza wachezaji
Meneja wa Habari na Mawasiliano klabu ya Yanga Ali Kamwe amefichua kuwa mkwanja uliowekwa mezani na GSM ni zaidi ya kile kitita ambacho wachezaji walichukua baaada ya ushindi wa 5G dhidi ya Simba
Zaidi ya Milioni 500 zitakuwa mikononi kwa wachezaji kama watashinda leo na kufuzu robo fainali
Hii ni mechi ambayo itatizamwa na mashabiki wengi barani Afrika na pengine hata nje ya Afrika
Ni mechi ya wachezaji kutangaza majina yao na kuweka heshima katika uso wa Afrika
Msimu uliopita Yanga ilicheza fainali ya kombe la Shirikisho (CAF CC) na kukosa kombe kikanuni tu, leo ni nafasi nyingine kwa Yanga kuonyesha kwamba tayari iko katika daraja la wale wanaoitwa vigogo
Ni wazi itakuwa mechi ngumu kwa kuwa kila timu inahitaji matokeo ili kujiweka vyema katika vita ya kufuzu robo fainali, lakini hakuna heshima kubwa kama ambayo wataipata wachezaji wa Yanga leo kama watashinda na muhimu kufanikiwa kufuzu robo fainali
Yanga ina dakika 180 za kuwania angalau alama nne ili ifuzu robo fainali lakini inaweza kutumia dakika 90 za leo kufuzu kama itaibuka na ushindi wa kuanzia mabao 4-0
