Yanga imeendelea kujichimbia kileleni mwa msimamo wa ligi kuu ya NBC baada ya ushindi wa mabao 2-1 dhidi ya Tanzania Prisons katika mchezo uliopigwa uwanja wa Sokoine
Mabao ya kipindi cha kwanza yaliyofungwa na Clement Mzize na Pacome Zouzoua yalitosha kunogesha shamra shamra za miaka 89 ya Yanga
Pengine Yanga ilistahili kufunga mabao zaidi katika kipindi cha kwanza Maxi Nzengeli akikosa moja ya nafasi adimu katika mchezo huo
Kipindi cha pili Yanga ilipata pigo baada ya Metacha Mnata kutolewa nje kwa kadi nyekundu baada ya kufanya madhambi nje kidogo ya eneo la hatari dhidi ya Zabona Mwayombya
Kukosekana mawasiliano kati yake na Mwamnyeto kulipelekea makosa hayo ambayo yalisababisha Prisons kufunga bao lao la kufutia machozi kupitia mpira wa adhabu uliopigwa na Jeremiah Juma
Ni alama tatu muhimu kwa Yanga ambazo zinafanya Yanga iendelee kuchimbia kileleni kwa tofauti ya alama nane dhidi ya Azam Fc inayoshika nafasi ya pili na alama 10 dhidi ya Simba inayoshika nafasi ya tatu
