Abdel Aziz Mohamed Bouh kutoka Mauritania, ndiye refa aliyepangwa na Shirikisho la Mpira wa Miguu Afrika (CAF) kuchezesha mechi ya hatua ya makundi ya Ligi ya Mabingwa Afrika baina ya Yanga na Al Ahly itakayochezwa Jumamosi katika Uwanja wa Benjamin Mkapa kuanzia saa 1:00 usiku
Wananchi watamkumbuka mwamuzi huyu kwani msimu uliopita alichezesha mechi ya hatua ya makundi kombe la Shirikisho kati ya Yanga dhidi ya TP Mazembe iliyopigwa uwanja wa Benjemin Mkapa
Mazingira ya mchezo ule hayana tofauti na mazingira ya sasa kwani Yanga ilikuwa imetoka kupoteza mchezo wa kwanza dhidi ya US Monastir na ilihitaji kushinda, baada ya dakika 90 Yanga ikaibuka na ushindi wa mabao 3-1
Wakati huu Yanga inakwenda kuikabili Al Ahly ikiwa imetoka kupoteza mchezo dhidi ya CR Belouizdad na itahitaji kushinda mchezo huo na pengine kurudia kile walichofanya kwenye michuano ya kombe la Shirikisho (CAF CC) msimu uliopita
