Kikosi cha Yanga majira ya saa 12 jioni kitashuka uwanja wa Benjamin Mkapa kuikabili Singida BS katika mchezo wa ligi kuu ya NBC
Baada ya ushindi wa mabao 3-2 dhidi ya Azam Fc, Wananchi wanarudi tena dimba la Mkapa kusaka alama nyingine tatu ambazo zitawaimarisha kileleni mwa msimamo wa ligi
Hata hivyo wanakutana na Singida BS iliyo katika kiwango bora sasa baada ya kuanza ligi kwa kusuasua
Ni mchezo wa pili mfululizo Yanga inatumia dimba la Mkapa ambao ndio uwanja wa nyumbani wa Wananchi
Mchezo huu utakuwa sehemu ya maandalizi ya kikosi cha Yanga kuelekea mchezo dhidi ya Simba utakaopigwa wiki ijayo, Novemba 05
Ushindi kwa Yanga utawahakikishia kuwa kileleni mwa msimamo wa ligi kabla ya kukutana na Simba ambao hata hivyo wana mechi moja ya kiporo ambayo huenda ikachezwa kabla vigogo hao wa soka nchini kukutana
Kocha Mkuu wa Yanga Miguel Gamondi amewataka mashabiki wa timu hiyo kujitokeza kwa wingi dimba la Mkapa jioni ya leo akiahidi vijana wake kutoa burudani itakayoambatana na ushindi
