Kiungo wa Yanga Jonas Mkude ana kazi ya kuendelea kupambana katika kiwanja cha mazoezi ili amshawishi Kocha Miguel Gamondi kumtumia kwenye kikosi chake
Mkude alianza vyema msimu akionyesha kiwango bora kilichompa nafasi ya kuitwa timu ya Taifa lakini baada ya kuchelewa kurejea kikosini kutoka kwenye majukumu ya timu ya Taifa, akakumbana na adhabu
Hata hivyo kwa sasa amerejea akiwa sehemu ya kikosi kinachojiandaa na mchezo wa ligi kuu dhidi ya Singida BS utakaopigwa uwanja wa Benjamin Mkapa Ijumaa, Oktoba 27
Gamondi aliwahi kusema katika kikosi chake kila mchezaji anayo nafasi ya kucheza jambo muhimu ni kuonyesha katika kiwanja cha mazoezi kuwa anastahili kupewa nafasi hiyo
"Kila mchezaji ana nafasi ya kucheza ndani ya kikosi changu, ninachoangalia ni bidii yao mazoezini, kwani lengo ni timu kufanikiwa kwenye malengo yake," yalikuwa maneno ya Gamondi katika moja ya mahojiano yake
Katika eneo la kiungo, Mkude anakabiliwa na ushindani kutoka kwa Khalid Aucho na Mudathir Yahya ambao wamejihakikishia nafasi ya kuanza
Lakini pia wapo Zawadi Mauya, Salum Abubakar na hata Pacome Zouzoua ambaye amekuwa akitumika katika maeneo tofauti kulingana na mahitaji ya mchezo
Katika mechi za karibuni Mkude hajafanikiwa kuingia hata kwenye orodha ya wachezaji wa akiba na hivyo ni wazi anapaswa kuendelea kupambana kwenye kiwanja cha mazoezi
