Mikiki mikiki ya ligi kuu ya NBC inaendelea leo ambapo mabingwa watetezi Yanga wako mkoani Mbeya kuwakabili Ihefu Fc katika mchezo utakaopigwa uwanja wa Highland Estates, huko Mbarali
Ni wazi hautakuwa mchezo rahisi kutokana na kile kilichotokea msimu uliopita ambapo Yanga ilipoteza mchezo kwa kufungwa mabao 2-1 katika uwanja huo wa Highland Estates
Yanga itaingia katika mchezo wa leo ikiwa na lengo la kulipa kisasi kwa kuibuka na ushindi na kurejea kileleni mwa msimamo wa ligi ambao Azam Fc wanaongoza baada ya kufikisha alama 10 jana wakilazimishwa suluhu ya bila kufungana dhidi ya Dodoma Jiji
Kuonyesha kuwa Yanga inautaka mchezo huo, Wananchi walitua Mbarali jana na jioni kukamilisha maandalizi yao kwenye uwanja wa Highland Estates
Msimu uliopita Yanga iliweka kambi Mbeya mjini na kuelekea Mbarali siku ya mchezo, Meneja wa Yanga Walter Harrison akidokeza kuwa uamuzi huo uliwaathiri
Kocha Mkuu wa Yanga Miguel Gamondi huenda leo akafanya mabadiliko ya kikosi chake kwa kuwapa nafasi wachezaji ambao hawakutumika katika mchezo uliopita wa ligi ya mabingwa dhidi ya Al Merriikh
Baada ya mchezo wa leo, Yanga inakabiliwa na mchezo mwingine wa ligi kuu katika kipindi cha siku tatu zijazo dhidi ya Geita Gold
Mchezo utapigwa kuanzia saa 10 jioni....!
