Nahodha wa Yanga, Bakari Mwamnyeto amesema kitendo cha timu hiyo kutinga makundi ya Ligi ya Mabingwa Afrika baada ya kupita miaka 25, imemfanya aingie kwenye historia ya klabu hiyo akisema ndoto zimetimia kwani kila mchezaji alikuwa anaumizwa na kelele za kushindwa kutinga hatua hiyo
Yanga ikicheza nyumbani kwenye Uwanja wa Azam Complex, jijini Dar es Salaam juzi iliifunga Al Merrikh ya Sudan na kuitoa kwa jumla ya mabao 3-0, kwani mchezo wa kwanza wa ugenini timu hiyo ilishinda mabao 2-0 jijini Kigali, Rwanda na kutinga makundi tangu ilipofuzu mara ya mwisho mwaka 1998
Kitendo cha kuwepo kwenye kikosi klilichozima mzimu ulioisumbua klabu hiyo, Mwamnyeto alisema amefurahi kwa kutimiza ndoto na kuwapa raha mashabiki wa Yanga na kwamba kwa sasa wanaenda kujipanga ili kufanya vizuri kama ilivyokuwa msimu uliopita walipofika fainali za Kombe la Shirikisho Afrika
"Nimefurahi sana kila mchezaji katika mchezo alikuwa na hamu ya kuona timu inasonga mbele na kwa jitihada na uwezo wa Mungu tumefanikiwa"
"Huko tunakoenda ndio kugumu zaidi, ila tutapambana tutafika mbali na kuiwakilisha nchi vizuri maana ni jukumu letu kama wachezaji kupambana kupata matokeo, hatua ya makundi sio mchezo maana timu zote zinakuwa bora"
"Tulivyoteleza mwaka jana viongozi waliona upungufu uko wapi na sisi wachezaji tulipambana tukashindwa kufikia hatua hii Ligi ya Mabingwa msimu huu tukakubaliana tupambane kweli kweli na Mungu kasikia dua zetu," alisema Mwamnyeto
Droo ya hatua ya makundi itafanyika Ijumaa Oktoba 06 huko Afrika Kusini ambapo kutakuwa na takribani wiki sita za maandalizi kabla ya mechi za makundi kuanza kutimua vumbi mwishoni mwa Novemba 2023
