Makamu wa Rais wa Yanga Arafat Haji amesema hawana wasiwasi wowote kuelekea mchezo wa Ligi ya Mabingwa dhidi ya Al Merrikh utakaochezwa kesho Jumamosi kwenye Uwanja wa Azam Complex, Dar es Salaam
Majira ya saa 1 usiku pale viunga vya Chamazi, Yanga itakuwa mwenyeji wa Al Merrikh katika mchezo ambao dakika 90 zinaweza kurejesha furaha ya Wananchi wakiishuhudia tena timu yao ikicheza hatua ya makundi ya ligi ya mabingwa baada ya kusubiri kwa takribani miaka 25
Ushindi wa mabao 2-0 ambao Yanga walipata ugenini katika Uwanja wa Kigali Pele, Nyamirambo nchini Rwanda, unawapa Wananchi matumaini makubwa ya kutinga hatua ya makundi
Arafat amesema wanafahamu mchezo huo wa pili hautakuwa mwepesi lakini wana imani na kocha Miguel Gamondi na benchi lake la ufundi pamoja na wachezaji wanaounda kikosi bora cha Yanga msimu huu
"Tunajua mchezo haujamalizika, dakika 90 za mchezo wa kwanza zilikwisha pale Kigali, Rwanda na Mungu akatujaalia tukapata ushindi wa mabao 2-0 ugenini, lakini kwa kuiangalia timu yetu, maandalizi ya mwalimu Miguel Gamondi, na ubora wa kikosi chetu, basi ni matumaini yetu kuwa tunakwenda kukamilisha pale palipobakia na kusonga hatua inayofuata ya makundi"
"Kwa sasa lengo letu ambalo ni shauku ya kila Mwanayanga ni kufuzu makundi na tukishafika huko tutajipanga ili kuona tunafika mbali kwenye michuano hiyo," alisema Arafat
Al Merrikh tayari wako nchini tangu siku ya Jumatano kocha wao akiweka wazi kuwa wamekuja kupambana kusaka ushindi na kutinga hatua ya makundi licha ya kuwa wako nyuma kwa mabao 2-0
