Kocha Mkuu wa Yanga Miguel Gamondi ni kama ameanza kuwapa majibu wale waliokuwa na hofu kuwa timu yake inakabiliwa na mapungufu kwenye safu ya ushambuliaji
Jana katika mchezo wa ligi kuu dhidi ya KMC uliopigwa uwanja wa Azam Complex, Yanga iliibuka na ushindi wa mabao 5-0 ambayo yalifungwa na wachezaji watano tofauti
Dickson Job, Stephane Aziz Ki, Hafiz Konkoni, Mudathir Yahya na Pacome Zouzoua walifunga mabao hayo
Katika mchezo huo yalionekana mabadiliko makubwa ya kimbinu hasa pale Yanga iliposhambulia. Sio chini ya wachezaji watano waliingia katika eneo la hatari
Aidha matumizi ya Aziz Ki na Zouzoua yameanza kulipa kwani wawili hao walikuwa chachu ya ushindi huo mkubwa wa Yanga katika mchezo wa kwanza
Aziz Ki alianza kama winga wa kushoto huku Pacome akitumika kama namba 10, wawili hao walikuwa wakibadilishana majukumu uwanjani na kuwachanganya walinzi wa KMC
Uwezo wao mkubwa wa kupiga pasi elekezi ulifanya maisha kuwa rahisi kwa walinzi wa pembeni Nickson Kibabage na Yao kukimbia katika nafasi
Kuna kila dalili msimu huu vinara wengi wa kupachika mabao wataonekana kulinganisha na msimu uliopita ambao Fiston Mayele alifunga mabao mengi peke yake
Aidha Mudathir Yahya ameendelea kuwa mchezaji muhimu katika eneo la kiungo sambamba na Khalid Aucho
Chini ya Gamondi katika mechi chache tu, Mudathir amekuwa bora sana pengine zaidi ya kile alichofanya wakati wa Nabi
Gamondi amempa Mudathir uhuru wa kucheza kila mahali uwanjani, ni mchezaji mwenye 'energy' kubwa sana
Jambo pekee ambalo atahitaji kulifanyia kazi ni kwenye umaliziaji kwani ni mchezaji ambaye anakuwa katika maeneo sahihi ya kufunga lakini mashuti yake mengi hupaa langoni ukiacha goli alilofunga jana
