Kabla ya Yanga kuingia kambini kwa ajili ya maandalizi ya msimu mpya (2023/24) hatma ya mshambuliaji Fiston Mayele itakuwa imefahamika
Mayele anatarajiwa kufanya kikao cha mwisho na viongozi wa Yanga siku ya Jumatatu ambapo baada ya kikao hicho itafahamika kama anabaki au anauzwa
Yanga ilimuwekea Mayele ofa ya kuongeza mkataba lakini wakati huohuo zipo ofa nono kutoka klabu nyingine jambo linalomfanya mchezaji huyo adai maslahi zaidi
Mayele amethibitisha kuwa watafanya kikao cha mwisho na uongozi siku ya Jumatatu, siku ambayo wachezaji wote wametakiwa kuripoti Avic Town
"Ni kweli zipo ofa kutoka hapa Afrika, Ulaya nchi ya Ubelgiji na Qatar, uongozi wa Yanga unafahamu. Mimi bado ni mchezaji wa Yanga mpaka 2024, Tutakaa na uongozi kikao cha mwisho, Jumatatu tutajua kama nitaondoka au nitabaki Yanga," alisema Mayele
Presha imekuwa kubwa kwa Mayele ambaye kwenye moja ya mahojiano yake alibainisha wazi anachohitaji ni fedha taarifa za ndani zikidokeza kuwa hajakubaliana na ofa ya mshahara ambao Yanga wamemuwekea mezani (Takribani Milioni 34 kwa mwezi)
Mshahara huo ungemfanya Mayele kuwa mchezaji anayelipwa fedha nyingi zaidi Tanzania lakini ni wazi ofa zilizopo mezani ni nono zaidi
Huenda Yanga ikalazimika kuchukua uamuzi mgumu wa kumuuza na kurudi sokoni kusaka mshambuliaji mbadala
Kwani kama hatasaini mkataba mpya, ataondoka bure mwishoni mwa msimu ujao mkataba wake utakapomalizika
kesi yake inafanana na kesi ya mshambuliaji wa PSG Kylian Mbappe ambaye amebakisha mkataba wa mwaka mmoja na timu hiyo huku akigomea kuongeza mkataba
PSG wamempa Mbappe mpaka Julai 31 awe ameamua, kusaini mkataba mpya au kuuzwa kwani klabu haiko tayari aondoke bure
Yanga ndio iliyokuza 'brand' ya Mayele akipata nafasi ya kuitwa timu ya Taifa ya DR Congo kwa mara ya kwanza na sasa kugombewa na klabu nyingi
Yanga haiwezi kukubali mchezaji huyo aondoke bure msimu ujao kama haiwezekani kuongeza mkataba basi wanaweza kuchukua fedha
