Juzi baada ya mchezo wa fainali kombe la Shirikisho la Azma (ASFC) dhidi ya Azam Fc ambao Yanga iliibuka mabingwa kwa ushindi wa bao 1-0 katika uwanja wa Mkwakwani, Rais wa Yanga Injinia Hersi Said aliweka bayana maboresho ambayo mabingwa hao wa nchi watafanya kuelekea msimu ujao
Hersi alisema kushinda mataji yote ya ndani kwa misimu miwili mfululizo halikuwa jambo rahisi, ili kuendelea kufanya vizuri msimu ujao watafanya maboresho katika maeneo machache ambayo yameainishwa katika ripoti ya benchi la ufundi
"Pamoja na mafanikio haya, lazima tuboreshe baadhi ya maeneo ili tuendelee kuwa washindani. Haimaanishi wachezaji hawa tulionao hatuwaamini la hasha! Ila yako maeneo ambayo tunadhani tunahitaji kuboresha ili tufanikiwe zaidi ya vile tulivyofanya msimu huu hasa kwenye michuano ya CAF," alisema Hersi
Tayari Yanga inahusishwa na nyota kadhaa ambapo mpaka sasa inaaminika Yanga tayari imekamilisha usajili wa baadhi ya wachezaji
Winga wa TP Mazembe Felippe Kinzumbi na kiungo aliyevunja mkataba na Al Hilal ya Sudan Fabrice Ngoma wanaweza kuwa sehemu ya kikosi cha Yanga msimu ujao
Katika safu ya ushambuliaji pia Yanga inahusishwa na Ranga Chivaviro ambaye ameachana na Marumo Gallants ya Afrika Kusini baada ya timu hiyo kushuka daraja
Ni ahadi ya Injinia Hersi kusajili mchezaji kutoka Ligi Kuu ya Afrika. Ahadi hiyo aliitoa katika moja ya mahojiano yake wakati yuko Afrika Kusini na Yanga kwenye mchezo wa mkondo wa pili nusu fainali ya kombe la Shirikisho barani Afrika dhidi ya Marumo Gallants
