Nafasi kubwa ya Yanga kujiweka katika mazingira mazuri ya kuandika historia ya kuwa timu ya kwanza Tanzania kucheza hatua ya fainali ya Kombe la Shirikisho Afrika ni kwa kuibuka na ushindi mnono nyumbani dhidi ya Marumo Gallants ya Afrika Kusini leo kwenye Uwanja wa Benjamin Mkapa kuanzia saa 10:00 jioni, hii ikionekana ni zamu yao kuweka rekodi
Tangu mashindano hayo yalipoanzishwa rasmi mwaka 2003 baada ya kuunganishwa kwa mashindano ya Kombe la CAF na Kombe la Washindi Afrika, hakuna timu yoyote ya Tanzania na Afrika Mashariki iliyowahi kutinga fainali yake na Yanga inasaka fursa hiyo ya kuandika historia ya kuwa ya kwanza
Ubora wa kikosi ilichonacho, mbinu za Kocha Nasreddine Nabi na benchi lake la ufundi pamoja na faida ya hamasa ambayo itapata mbele ya mashabiki wake watakaojitokeza kwenye Uwanja wa Benjamin Mkapa leo, vitaongeza chachu kwa Yanga kupata ushindi muhimu nyumbani ili isiwe na mlima mrefu wa kupanda katika mechi ya marudiano ugenini itakayochezwa wiki moja baadaye.
Uthibitisho wa ubora wa kikosi cha Yanga unatokana na kuwa na kundi kubwa la wachezaji ambao wanaonekana kufanya vizuri katika idara zao kwa mujibu wa takwimu za mashindano hayo kuanzia hatua ya makundi hadi sasa
Yanga ina wachezaji ambao wameingia katika tatu bora katika chati za wafungaji bora, wachezaji bora, mashuti yaliyolenga lango, ukokotaji mpira na kutoruhusu mabao
Mchezo huo wa leo utachezeshwa na marefa kutoka Misri na mwamuzi wa kati atakuwa ni Mahmoud El Banna atakayesaidiwa na Ahmed Hossam Taha na Samy Halhal huku mwamuzi wa akiba akiwa ni Mahmoud Nagi
