Kocha Mkuu wa Yanga Nasreddine Nabi amesema Marumo ni timu nzuri, wamejiandaa kukabiliana nao kwenye mchezo wa mkondo wa kwanza nusu fainali ya kombe la Shirikisho barani Afrika
Akizungumza katika Mkutano na Wanahabari mapema leo, Nabi alisema watachuana na Marumo iliyotinga nusu fainali kombe la Shirikisho na sio Marumo inayoshikanafasi za chini kwenye ligi kuu ya Afrika Kusini
"Marumo ni timu nzuri, sisi tumejiandaa kucheza na timu iliyofika nusu fainali na sio nafasi yao kwenye msimamo wa ligi ya kwao"
Nabi amesema wanatambua hawawezi kufuzu fainali kwa dakika 90 za mchezo wa kwanza nyumbani hapo kesho, wamejiandaa kwa ajili ya kupambana kwa dakika 180 za mechi zote mbili
"Ni mechi inayohitaji akili na tahadhari kubwa sana. Tunacheza mechi ya kwanza nyumbani lakini tunatambua hatuwezi kufuzu kwa matokeo ya mchezo mmoja. Tutacheza huku tukifahamu tuna dakika 180 za kufuzu"
"Wachezaji wote wako tayari kwa mchezo, ari ya timu ni kubwa kila mchezaji akitamani kuwa sehemu ya mechi hiyo," alisema Nabi
Nabi amewataka mashabiki wa Yanga kujitokeza kwa wingi katika mchezo huo ili kuwaongezea wachezaji wao hamasa ili kuhakikisha wanapata matokeo mazuri
"Niwashukuru sana mashabiki wa Yanga kwa sapoti mliyotupa kutoka mwanzo mpaka leo, nawaomba kesho tuongeze kitu kimoja. Kesho tushangilie kwa dakika zote 90, hata katika nyakati timu haina mpira tusiwe kimya, tupambane kushangilia ili kuwapa nguvu wachezaji wetu. Hii mechi sio nyepesi kama wengi wanavyodhani"
