Baada ya Kamati ya Sheria na hadhi za wachezaji ya Shirikisho la Mpira wa Miguu Tanzania (TFF) kutupilia mbali maombi ya kiungo Feisal Salum 'Fei Toto' aliyetaka kuvunja mkataba wake na Yanga, hakuna tena nafasi ya Shauri hilo kusikilizwa katika ardhi ya Tanzania
Kama Feisal hajaridhika na maamuzi hayo, anapaswa kwenda CAS/FIFA ambako kimsingi atashindwa kwa kuwa rejea itabaki kuwa maamuzi ya Kamati ya Sheria na hadhi za Wachezaji
Nafasi pekee ambayo Feisal anaweza kuitumia kuvunja mkataba wake ni kufika meza ya mazungumzo na klabu ya Yanga, alipaswa kufanya hivyo tangu siku ya kwanza badala ya kuvunja mkataba kupitia Instagram!
TFF imelinda maslahi ya mpira wa miguu kwani alichofanya Feisal kama kingeidhishwa basi wachezaji wengi wangetumia utaratibu huo kuachana na klabu zao
Wachezaji na klabu zinapaswa kuheshimu mikataba, lazima utaratibu ufuate pale upande mmoja unapotaka kuvunja mkataba
Mkataba ambao hauna kasoro hauwezi kuvunjwa na upande mmoja, lazima pande zote mbili zikae na kufikia makubaliano
Njia pekee ya kumsaidia Feisal ni kumshauri afuate utaratibu kama ulivyoainishwa kama anataka kuondoka, Yanga haijamlazimisha Feisal, bali imelinda maslahi yake
Kama kuna timu inataka kumsajili Feisal inapaswa kupeleka ofa Jangwani, kama ni yeye mwenyewe anataka kuondoka kwa utashi wake pia anapaswa kwenda kuzungumza na waajiri wake
