Rais wa Yanga Injinia Hersi Said amesema uongozi hauna tatizo na kiungo Feisal Salum 'Fei Toto' lakini wanasikitishwa na watu wanaomlaghai mchezaji huyo na kupelekea asiwe katika majukumu yake
Akihojiwa Clouds FM mapema leo, Hersi alisema kama kuna mtu anamlaghai Feisal anapaswa kupigwa vita na kila anyelitakia mema soka la Tanzania
Hersi amesema hamlaumu Feisal kwa kuwa anafahamu amewekwa katika mazingira magumu ambayo yalimfanya achukue maamuzi aliyochukua pasipo kuzingatia mkataba wake
"Kitendo cha mtu kumlaghai mchezaji kama kuna kitu kama hicho kimefanyika ni katika vitu vya hovyo vilivyowahi kutokea hapa nchini"
"Kuna taratibu zinaweza kufanyika na mchezaji akaenda kwenye Klabu nyingine lakini mtu anapita anamlaghai mchezaji hakuna binadamu anaweza kukwepa huo mtego"
"Simlaumu Feisal na kama kuna mtu wa hivyo anatakiwa apigwe vita huyo ni adui wa maendeleo ya mchezaji na Maendeleo ya mpira kwa ujumla"
"Mkataba ni ishu ya Taasisi haihusiani na ishu binafsi kama Rais au kiongozi yoyote mwingine. Matakwa ya kimkataba yanamuhitaji Feisal awepo kwenye klabu kwa hiyo Feisal ana mkataba anatakiwa arudi"
"Inapokuja ishu binafsi sisi kama viongozi ni wazazi pia hawa wachezaji mnaowaona kila siku pale sio kwamba hawatukosei. Wanatukosea kila siku lakini unawachukulia kama watoto na mzazi"
"Kile ambacho unahitaji kumuelekeza unakaa naye unamwelekeza, mnakwenda mbele. Feisal ni mchezaji wetu, Kijana wetu kuna watu wanaongeza chumvi huko kwenye mitandao. Hicho kwetu sio kitu muhimu. Tuna mkataba na Feisal hadi 2024. Ataendelea kuwa mchezaji wetu"
"Feisal akirudi tutampokea kwa mikono miwili. Tutamsapoti na ataendelea na majukumu yake," alisema Hersi
