Kwa kutinga hatua ya makundi ya michuano ya kombe la Shirikisho barani Afrika, Yanga imepanda katika orodha ya ubora kutoka nafasi ya 75 mpaka nafasi ya 48
Wananchi wanapaswa kupambana kwelikweli angalau kutinga robo fainali ili kujiongezea alama ambazo zitawafanya waendelee kupanda juu kwenye viwango vya CAF
Yanga imekusanya alama 2.5 (0.5x5) kwa kufanikiwa kutinga makundi. Alama hizo zitaongezeka kama watamaliza nafasi ya tatu au kwenda juu
Wakimaliza nafasi ya tatu watakuwa na alama 5 (1x5), wakifanikiwa kutinga robo fainali ni 10 (2x5), nusu fainali ni 15 (3x5), wakitinga fainali ni 20 (5x4) na wakiwa mabingwa ni 25 (5x5)
Kuna faida kubwa kuwa juu kwenye viwango vya ubora vya CAF kwani kwa timu zinazokuwa nafasi za juu kabisa mara nyingi hazishiriki hatua ya awali ya michuano ya ligi ya mabingwa na Shirikisho
Kwa zile timu ambazo ziko juu kwenye viwango lakini hazikufikia sifa ya kutocheza hatua ya awali, mara nyingi hupata ratiba rafiki katika mechi zao kwani hupangwa na timu ambazo ziko chini katika orodha ya ubora
Simba imenufaika na utaratibu huo katika miaka mitano iliyopita baada ya kutinga robo fainali mara kadhaa kwenye ligi ya mabingwa na Shirikisho
Msimu huu Simba hawakuwa na njia ngumu kutinga makundi ya ligi ya mabingwa wakipangwa na Nyasa Big Bullets na De Agosto
Yanga kupangwa na Al Hilal katika raundi ya kwanza ni kutokana na utaratibu huo wa CAF, Yanga ilikuwa nafasi ya 75 kwenye viwango wakati Al Hilal walikuwa katika nafasai 20 bora
Timu inapokuwa juu katika viwango vya CAF inajiweka katika nafasi nzuri ya kuendelea kubaki katika nafasi hiyo kwani angalau kila msimu kuna uhakika wa kutinga hatua ya makundi
