Kikosi cha Yanga leo kimeingia kambini kwa ajili ya maandalizi ya mchezo wa ligi kuu dhidi ya Ihefu Fc ambao utapigwa Jumatatu, Januari 16 katika uwanja wa Benjamin Mkapa
Baada ya mapumziko ya mwanzo wa mwaka, wachezaji ambao hawakushiriki michuano ya kombe la Mapinduzi wameingia kambini leo huku wenzao walioshiriki michuano hiyo wakitarajiwa kuingia kesho Ijumaa
Afisa Habari wa Yanga Ali Kamwe amesema mechi dhidi ya Ihefu Fc ina umuhimu wa kipekee kwao wakihitaji kushinda katika mkakati wa kutetea ubingwa
Mechi dhidi ya Ihefu Fc ni moja ya mechi ambazo Yanga wanatarajiwa kucheza mfululizo katika uwanja wa Benjamin Mkapa
Kama hakutakuwa na mabadiliko kwa mechi dhidi ya KMC, Yanga itacheza mechi saba mfululizo katika uwanja wa Benjamin Mkapa na pengine inaweza kujihakikishia kutetea ubingwa mapema kama watashinda mechi hizo
Baada ya Ihefu Fc, mechi itakayofuata ni dhidi ya Ruvu Shooting ambayo itapigwa Januari 21 katika uwanja wa Benjamin Mkapa na kisha kufuatiwa na mchezo dhidi ya Namungo Fc ambao utapigwa Februari 04 katika uwanja huo
Ratiba inaonyesha KMC dhidi ya Yanga nao utapigwa uwanja wa Benjamin Mkapa February 22 na kisha kufuatiwa na mchezo kati ya Yanga dhidi ya Geita Gold ambapo utapigwa March 12 katika dimba la Mkapa
Mtanange wa Simba dhidi ya Yanga utapigwa April 09 katika uwanja wa Benjamin Mkapa na kisha kufuatiwa na mchezo kati ya Yanga dhidi ya Kagera Sugar ambao utapigwa April 16 katika dimba la Mkapa
