Mikiki mikiki ya ligi kuu ya NBC inaendelea leo ambapo vinara wa ligi hiyo Yanga watakuwa wenyeji wa Coastal Union katika mchezo utakaopigwa uwanja wa Benjamin Mkapa, saa 12:15 jioni
Baada ya ushindi wa mabao 3-0 katika mchezo uliopita dhidi ya Polisi Tanzania, Yanga itaingia kwenye mchezo huo ikiwa na dhamira ya kuendeleza pale walipoishia
Alama tatu zitawahakikishia Wananchi kuendelea kujikita kileleni mwa msimamo wa ligi
Hata hivyo mara nyingi mechi dhidi ya Coastal Union sio nyepesi, timu hiyo imekuwa na kawaida ya kuipa changamoto Yanga katika mechi zake ingawa Yanga imekuwa na takwimu nzuri inapocheza dhidi ya Coastal katika uwanja wa Benjamin Mkapa
Kwa ushindani uliopo kwenye ligi, Yanga haipaswi kudondosha alama katika uwanja wake wa nyumbani
Kocha Msaidizi wa Yanga Cedric Kaze amesema wataingia katika mchezo huo wakiwa na kikosi chao kamili, hawana majeruhi zaidi ya mlinda lango Aboutwalib Mshery
Ni nafasi nyingine kwa mshambuliaji kinara wa mabao Fiston Mayele kuendelea kujiimarisha katika mbio za kuwania ufungaji bora
