Kikosi cha Yanga leo majira ya saa 1 usiku kitashuka uwanja wa Benjamin Mkapa kuumana na Polisi Tanzania katika mchezo wa ligi kuu ya NBC
Ni mchezo muhimu kwa Yanga kuwania alama zote tatu ili kuendelea kujichimbia kileleni mwa msimamo wa ligi
Jana Azam Fc walidondosha alama mbili mkoani Kagera baada ya kulazimishwa sare ya mabao 2-2 dhidi ya Kagera Sugar
Kimahesabu Yanga inaweza kunufaika na sare hiyo kama itaibuka na ushindi leo, kwani wataongeza wigo wa tofauti ya alama dhidi ya Azam Fc kuwa tano
Kocha Msaidizi wa Yanga Cedric Kaze amesema leo watawakabili Polisi Tanzania wakiwa katika wakati wao bora zaidi msimu huu
Wamepata muda mzuri wa mapumziko na kufanya maandalizi ya kiufundi huku wakiwa wana mchezaji mmoja tu ambaye ni majeruhi, mlinda lango Aboutwalib Mshery
Ni mchezo wa kwanza kwa kocha Mwinyi Zahera kuchuana na waajiri wake wa zamani, Yanga
