Nsajigwa asisitiza ushindi utapatikana Shelisheli

Kocha Msaidizi wa Yanga Shedrack Nsajigwa amesema wamejiandaa kuibuka na ushindi kwenye mchezo wa ligi ya mabingwa dhidi ya St Louis keshokutwa.

Akizungumza jana muda mfupi kabla ya Yanga haijakwea pipa kwenda Shelisheli, Nsajigwa alisema licha ya kupata ushindi 'kiduchu' wa bao 1-0 kwenye mchezo wa kwanza, wamebaini makosa yaliyowanyima ushindi mnono kwenye mchezo wa kwanza.

"Hatutacheza soka la kuzuia kwa muda wote, mchezo uliopita sisi kama benchi la ufundi tumeona mapungufu yao na nini tulitakiwa kukifanyia kazi, na tumefanya hivyo," alisema Nsajigwa.

"Mahesabu yetu tunataka kupata bao la mapema ili kuwachanganya na sisi kujiweka katika nafasi nzuri kwa kuuteka mchezo.

"Nikiri tu hautakuwa mchezo rahisi, lakini tunaenda kupambana kwa sababu tuna mbinu za kutuwezesha kufanya hivyo," aliongeza kusema Nsajigwa.

Kwenye mchezo huo Yanga itamkosa kinara wake wa mabao Obrey Chirwa aliyebaki jijini Dar es salaam akisumbuliwa na maumivu ya nyama za paja.

Kiungo Papi Tshishimbi na mshambuliaji Ibrahim Ajib wamepewa jukumu na benchi la ufundi kuhakikisha Yanga inasonga mbele.

Wengine ni Emanuel Martin ambaye yuko katika kiwango bora sambamba na Pius Buswita.

Yanga imesafiri na wachezaji 20.