Rostand awatuliza mashabiki Yanga

kipa wa Yanga, Youthe Rostand, amesema mashabiki waliokuwa wakibeza uwezo wake watulize mzuka kwani amepanga kufanya makubwa hasa kwenye mashindano ya kimataifa.

Rostand amesema anatambua kwamba mashabiki walikuwa wameanza kukosa imani naye hasa katika upande wa penalti, hivyo alikuwa akijifua ili kuwa fiti na kumaliza tatizo hilo.

Kipa huyo aliibeba Yanga kwenye mikwaju ya penalti dhidi ya Ihefu FC katika Kombe la FA ambapo sasa wametinga hatua ya 16 Bora.

"Siku zote likitokea jambo baya huwezi kulijibu kwa maneno, inabidi uwajibu kwa kusahihisha lile tatizo ambalo lilizua maneno. Nashukuru Mungu zoezi langu limeanza kukamilika kidogo kidogo, nitakuwa nafanyia kazi zaidi,"alisema.

"Tunajua kwamba mashabiki wanataka matokeo mazuri muda wote, tutahakikisha tunapambana ili tuweze kusonga mbele katika mashindano ya kimataifa. Mimi, Kabwili (Ramadhani) na Kakolanya (Beno) wote tupo vizuri katika kulinda lango, hivyo hatutowaangusha, hata wachezaji wengine nao wanafanya vizuri kwenye nafasi zao, tutatumia mashindano haya kujitangaza," aliongeza Rostand katika mahojiano na gazeti la Mwanaspoti