Kocha Msaidizi wa Yanga Cedric Kaze amesema wamejiandaa kukabiliana na Ruvu Shooting katika mchezo wa ligi kuu ambao utapigwa kesho Jumatano katika uwanja wa Lake Tanganyika mkoani Kigoma
Kaze amesema wanafahamu mchezo hautakuwa mwepesi kwa kuwa mechi zote wanazokutana na Ruvu Shooting zinakuwa na upinzani mkali
Hata hivyo amesema wamewaandaa wachezaji kimwili na kiakili kuweza kupata matokeo dhidi ya Ruvu Shooting hasa wakizingatia wanatoka kwenye mchezo mgumu dhidi ya Simba uliopigwa uwanja wa Benjamin Mkapa Jumamosi iliyopita na kumalizika kwa matokeo ya suluhu ya bila kufungana
Kaze amesema watatumia wachezaji bora zaidi kwenye kila nafasi ili kuhakikisha wanapata matokeo mazuri
"Tumekuwa tukifanya mazoezi ya kupoza miili baada ya kutoka kwenye mchezo dhidi ya Simba ambao nguvu nyingi ilitumika. Tumewaandaa wachezaji kuwakabili Ruvu Shooting katika mchezo ambao utakuwa mgumu"
"Ruvu Shooting wana timu nzuri na mara nyingi wametupa upinzani katika michezo tuliyokutana nao. Ni mchezo ambao tutahitaji kutumia wachezaji wetu bora katika kila nafasi ili tuweze kupata matokeo mazuri," alisema Kaze
