Msemaji wa Yanga Haji Manara amesema anaamini ni suala la muda tu Yanga itatangazwa kuwa mabingwa wa ligi kuu ya NBC msimu wa 2021/22
Akizungumza katika tukio la futari lililoandaliwa na GSM jana, Manara alisema ubora wa kikosi cha Yanga unawapa kila sababu ya kuamini watatwaa ubingwa wa ligi kuu msimu huu
"Kuna mwandishi mmoja kaandika makala ndefu akidai kuwa GSM na Yanga wanafanya matukio mengi ya charity kwa sababu wanautaka ubingwa. Ukweli ni kuwa ubingwa tunao tu, matukio haya tunayafanya kwa sababu tumeona kuna wenzetu wanahitaji kusaidiwa na pia ni jambo jema kwani tunafahamu yana malipo kutoka kwa Mwenye ez Mungu"
"Kuhusu ubingwa ni suala la muda tu, pengine tunasubiri mwezi mmoja na wiki moja au mbili, Mwenyekiti wa Bodi ya Ligi Mzee Mnguto atatuandikia barua kutuuliza ni wapi angependa tukakabidhiwe kombe letu. Jamani kwa Yanga hii yenye kina Aucho na Bangala tunawezaje kukosa ubingwa?," alitamba Manara
Yanga iko kileleni mwa msimamo wa ligi kuu ya NBC ikiwa na alama 51 baada ya kushuka dimbani mara 19 ikifuatiwa na Simba yenye alama 41 pia ikicheza michezo 19
Kimahesabu Wananchi wana nafasi kubwa ya kuwa mabingwa, katika michezo 11 iliyobaki, wanahitaji kushinda michezo nane tu
