Baada ya kutinga nusu fainali ya kombe la FA, Kocha Msaidizi wa Yanga Cedric Kaze amesema wako tayari kwa mchezo utakaofuata kwenye hatua ya nusu fainali bila ya kujali watakutana na nani
Juzi Yanga ililazimika kusubiri mikwaju ya penati kutinga nusu fainali dhidi ya Geita Gold baada ya kulazimishwa sare ya bao 1-1 katika dakika 90 za mchezo uliokuwa na ushindani mkali
Yanga ina nafasi kubwa ya kukutana na watani zao Simba kwenye mchezo wa nusu fainali, Simba itacheza na Pamba Fc mchezo wa robo fainali ambao utapigwa uwanja wa Benjamin Mkapa
Akizungumzia mchezo dhidi ya Geita Gold, Kaze amesema ushindani waliokutana nao katika mchezo huo waliutarajia
"Geita walicheza vizuri, walipata muda wa kutosha wa kujiandaa, lakini sisi tuliingia na uchovu baada ya mchezo wetu dhidi ya Azam Fc siku tatu zilizopita. Walikuwa vizuri kuzuia wakipata mpira walikuwa na kasi ya kushambulia, mechi ilivyokuwa ikiendelea ndivyo walivyozidi kujiamini"
"Tumeona hata kwenye michezo miwili ya ligi tuliyokutana na Geita ni timu nzuri, tumeifunga lakini imetupa tabu sana naamini kama itaendelea kuwa hivi itaendelea kufanya vizuri kwenye michezo yake iliyobaki"
"Tumejiwekea malengo ya kushinda taji la FA, tumeingia nusu fainali na tuko tayari kukutana na timu yoyote katika hatua hiyo," alisema Kaze
