Mshambuliaji wa Yanga Fiston Mayele amesema zawadi ya ng'ombe aliyopewa na shabiki Mauya Kanduru imemuongezea ari na atahakikisha anaendelea 'kutetema'
Mayele alikabidhiwa ng'ombe wake jana na Kanduru ambaye amemsafirisha ng'ombe huyo kutoka mkoani Morogoro kwa gharama zake
Kanduru pia alitoa mbuzi mmoja kwa Rais wa Makampuni ya GSM Ghalib Said Mohammed kumpa pole baada ya kufiwa na baba yake mzazi hivi karibuni
Mayele amesema ni faraja kwake kuona mashabiki wa Yanga wanavyoipenda timu yao pamoja na wachezaji wao
Tukio hilo limemuongezea ari yeye pamoja na wachezaji wenzake kuhakikisha wanafanikisha malengo ya kutwaa ubingwa msimu huu
"Shabiki aliahidi kunipatia ng'ombe na leo ametimiza ahadi yake. Nafurahi vile mashabiki wa Yanga wanaipenda timu yao pamoja na sisi wachezaji. Tukio hili linatuongezea ari sisi wachezaji tuzidi kupambana na mimi binafsi nitahakikisha naendelea 'kutetema' ili kushinda ufungaji bora," alisema Mayele
Aidha kwa upande wa mtoa zawadi Kanduru, amesema ataendelea kutoa ng'ombe kwa Mayele kama ataendeleza moto wake wa kufunga mabao
