Baada ya kufanikiwa kutinga robo fainali ya michuano ya kombe la Shiriisho la Azam (ASFC) kwa kuichapa Biashara United mabao 2-1, Afisa Habari wa Yanga Hassan Bumbuli amesema sasa wanaelekeza nguvu zao kwenye mchezo unaofuata katika ligi kuu dhidi ya Mtibwa Sugar
Jumatano ya Februari 23, Yanga itasafiri kule Manungu, Turiani Morogoro kuifuata Mtibwa Sugar katika mchezo wa kukamilisha duru ya kwanza ligi kuu ya NBC
Bumbuli amesema baada ya mchezo dhidi ya Biashara United, wachezaji wamepewa mapumziko ya siku moja na kesho Alhamisi wanarejea kambini kuendelea na maandalizi ya mchezo huo
"Baada ya matokeo ya mchezo dhidi Mbeya City kuna jambo tumejifunza, tumeongeza umakini kwenye maandalizi yetu, wachezaji wamepewa mapumziko ya siku moja kisha watarejea kambini kuendelea na maandalizi"
"Sisi tuko tayari kucheza katika uwanja wowote hapa Tanzania, hivyo hatuhofii kwenda kucheza Manungu," alisema Bumbuli
