Benchi la ufundi kufanyia kazi safu ya ushambuliaji

Kikosi cha Yanga kimerejea mazoezini leo kujiandaa na mchezo wa ligi kuu ya Vodacom mzunguuko wa 15 dhidi ya Azam FC.

Juzi Yanga ilipata ushindi 'kiduchu' wa bao 1-0 dhidi ya Ruvu Shooting na kupanda hadi nafasi ya tatu kwanye msimamo wa ligi baada ya kufikisha alama 25.

Juzi wakati akizungumza na waandishi wa habari, Kocha Msaidizi wa Yanga Shedrack Nsajigwa alisema tatizo pekee linaloikabili Yanga kwa sasa ni ubutu wa safu ya ushambuliaji.

Nsajigwa alisema benchi la ufundi litahakikisha linaondoa tatizo hilo ili kuirejesha Yanga kwenye uwezo wake wa kufunga mabao mengi kuelekea mchezo dhidi ya Azam FC

Obrey Chirwa na Ibrahim Ajib ndio vinara wa upachikaji mabao katika kikosi cha Yanga wakiwa wamefunga jumla ya mabao 11.

Wawili hao walitengeneza pacha hatari lakini mwendelezo wake ulikatika baada ya Chirwa kuanza 'mgomo baridi' huku Ajib akikosekana kwenye mchezo dhidi ya Mbao FC akitumikia adhabu ya kadi tatu za njano.

Baadae Chirwa alifungiwa michezo mitatu na TFF kutokana na utovu wa nidhamu lakini sasa amemaliza adhabu hiyo.

Pengine kurejea kwa Chirwa kutarejesha makali ya upachikaji mabao ya kikosi cha Yanga.

Amissi Tambwe amekuwa majeruhi kwa muda mrefu. Tangu arejee dimbani hajafanikiwa kuzifumania nyavu kwenye ligi, pengine atahitaji muda zaidi kurejesha uwezo wake wa kuzifumania nyavu.