Matokeo dhidi ya Mwadui FC yametusikitisha - Nsajigwa

Kocha Msaidizi wa Yanga Shedrack Nsajigwa amesema benchi la ufundi halifurahishwi na matokeo ya mchezo dhidi ya Mwadui FC.

Akizungumza na waandishi wa habari baada ya mchezo jana, Nsajigwa amesema Yanga ilihitaji kupata ushindi katika mchezo huo ili kuweka hai matumaini ya kutetea ubingwa kwa msimu wa nne.

Hata hivyo amesema mbinu za kujilinda zilizotumiwa na Mwadui FC ziliinyima Yanga ushindi.

“Matokeo kwetu sio mazuri kwa sababu malengo yetu ni kutetea ubingwa, tulihitaji sana hizi pointi tatu za leo angalau tupunguze idadi ya pointi ambazo wenzetu wametutangulia, tumejitahidi kadiri ya uwezo wetu lakini bahati mbaya tumeshindwa kupata pointi tatu ingawa tupo kwenye uwanja wa nyumbani.”

“Niwapongeze Mwadui kwakuwa wamefanya vizuri homework yao, mwanzo tulikuwa tunacheza kama wanavyocheza wao lakini baadaye tukabadilisha tukaanza kutumia mipira mirefu lakini njia zote waliziba.”

“Tukaamua kucheza kwa kutumia pembeni lakini bado hatukuwa na nguvu nzuri ya kwenda kumalizia magoli kwa hiyo niwapongeze Mwadui kwa walichokifanya, walicheza vizuri wamepata pointi moja,” amefunguka Nsajigwa

Baada ya mchezo huo Yanga inajipanga kwa ajili ya mchezo unaofuata dhidi ya Ruvu Shoooting, mchezo utakaopigwa kwenye uwanja wa Taifa, Jumapili, Januari 21 2018