Baada ya uongozi wa Azam Fc kutangaza kuwasamehe nyota wao Salum Abubakari 'Sure Boy', Aggrey Morris na Mudathir Yahya na kuwataka warejee kikosini, Sure Boy amesisitiza kutorejea katika klabu hiyo huku akitaka kuvunja mkataba wake
Azam Fc iliwasimamisha wachezaji hao kwa muda usiojulikana wakituhumiwa na makosa ya utovu wa nidhamu, ikatangaza kuwasamehe baada ya kuibuka tetesi kuwa nyota hao wanahitajiwa na klabu za Yanga na Simba
Afisa Habari wa Azam Fc Thabit Zakaria 'Zakazakazi' amethibitisha kuwa Mudathir na Morris wamerejea kikosini lakini Sureboy amewasilisha maombi ya kuvunja mkataba wake
"Sure Boy yeye hajaungana na wenzake na ameomba kwa mdomo kuvunja mkataba baada ya kuitumikia Azam kwa muda mrefu. Tunasubiri barua rasmi kutoka kwake," alisema Zakazakazi
Je baada ya majaribio ya Yanga kumn'goa Sure Boy Azam Fc kwa misimu kadhaa kugonga mwamba, safari hii itawezekana?
Msimu uliopita ilibaki kidogo tu Yanga imsajili lakini Azam Fc wakapindua meza dakika za majeruhi na kufanikiwa kumbakisha huku wakimuongezea mkataba wa mwaka mmoja
Mgogoro ulioibuka karibuni pengine unaweza kuinufaisha Yanga kumnasa nyota huyo ambaye anataka kufuata nyayo za Baba yake Abubakar Salum 'Sure Boy OG' ambaye aliitumikia Yanga kwa mafanikio makubwa
Sure Boy ameonyesha hataki tena kuitumikia Azam Fc hasa baada ya kusimamishwa katika mazingira ya kutatanisha na kusamehewa baada tetesi kumuhusisha na Yanga
