Yanga imeendeleza vipigo ligi kuu ya NBC baada ya kuichapa Tanzania Prisons mabao 2-1 katika mchezo uliopigwa uwanja wa Nelson Mandela, Sumbawanga
Kocha Mkuu wa Yanga Nasreddine Nabi ameutoa ushindi huo kwa wachezaji wenyewe baada ya kupambana licha ya wengi wao kuwa wagonjwa
Samson Mbangula aliitanguliza Prisons kwa bao la kichwa kwenye dakika ya 12 baada ya walinzi wa Yanga kuzembea kuondoa mpira wa kona langoni
Hata hivyo Feisal Salum 'Fei Toto' aliirejesha Yanga mchezoni kwenye dakika ya 24 akifunga bao safi kwa shuti kali ndani kidogo ya 18
Yanga iliendelea kutawala mchezo huo na kuongeza bao la pili kupitia kwa Khalid Aucho aliyeunganisha kwa kichwa krosi ya Saido Ntobazonkiza
Aucho ndiye aliyetengeneza bao la kwanza lililofungwa na Fei Toto
Ulikuwa ni mchezo wenye matumizi makubwa ya nguvu hata hivyo Yanga ilipambana kulinda mabao yake mpaka dakika 90 zilipokamilika
Akizungumza baada ya mchezo, Nabi alisema kuna wachezaji hawakuwa wamefanya mazoezi kwa siku mbili lakini leo wakaomba wapewe nafasi kuipigania timu
Afisa Habari wa Yanga Hassan Bumbuli amesema wachezaji 13 walikuwa wagonjwa lakini leo wamejitoa kuipigania timu na wameweza kuondoka na alama zote tatu
