Kocha Mkuu wa Yanga Nasreddine Nabi amesema mshambuliaji Fiston Mayele anastahili kuanza katika kikosi cha kwanza mbele ya Heritier Makambo kutokana na ubora anaoonyesha uwanjani
Makambo ambaye ni kipenzi cha mashabiki wa Yanga, amekuwa na wakati mgumu wa kupata nafasi katika mechi saba za ligi ambazo Yanga imecheza mpaka sasa
Hata hivyo hakuna shabiki anayeweza kuhoji uamuzi wa Nabi kumtumia Mayele kama mshambuliaji wake namba moja
Mayele amepachika mabao matatu katika mechi saba za ligi huku akitoa pasi moja ya bao. Ameonyesha uwezo mkubwa sana akiwa mwiba mkali kwa walinzi wa timu pinzani
Nabi amesema anajivunia kuwa na washambuliaji hao wawili katika kikosi chake kwani hata Makambo nae sio mshambuliaji mbaya
Lakini amesisitiza sio rahisi kwa kocha kumuweka nje mchezaji ambaye yuko kwenye ubora, akifanya kazi yake vyema
"Mashabiki wanampenda Mayele na anafanya vizuri sana akiwa uwanjani, mimi kama kocha siwezi kumweka nje mchezaji ambaye anafanya kazi nzuri uwanjani.
"Wapo wanaohoji kwa nini Makambo hachezi, siyo mchezaji mbaya anaonyesha jitihada kubwa sana kwenye uwanja wa mazoezi. Nafikiri atapata nafasi kulingana na mahitaji ya mechi," alisema Nabi
Kumekuwa na tetesi kuwa Makambo hafurahii kutopata nafasi kikosini ikielezwa kuwa klabu ya AS Vita imeonyesha nia ya kutaka kumsajili
