Kocha Mkuu wa Yanga, Nasreddine Nabi, amesema malengo yao ni kuhakikisha wanaibuka na ushindi katika mchezo wa kesho wa Ligi Kuu ya NBC dhidi ya Namungo FC
Kikosi cha Yanga kilitua mkoani Lindi jana jioni ambapo Nabi alibainisha kuwa wachezaji wake wote waliosafiri na timuwako fiti na anatarajia watafanya kile ambacho amekieleza kwenye programu zake mbalimbali.
Nabi amebainisha kuwa kila mchezaji amempa majukumu yake na amewataka wawe na 'heshima' kwa wapinzani wao kwa sababu wanacheza ugenini.
"Tumeshakamilisha programu za mazoezi kwa ajili ya mechi yetu ya Jumamosi, kilichobakia ni maelekezo madogo madogo, katika mpira huwezi kumaliza mechi mpaka utakaposikia filimbi ya mwisho, kwa sasa tunaiangalia kwa awamu ya mwisho kabla ya kuingia uwanjani," alisema Nabi
Ni mchezo unaotarajiwa kuwa na upinzani mkali kutoka kwa kila timu, rekodi za michezo ya nyuma zikidhihirisha hilo
Namungo Fc tangu ilipopanda daraja misimu miwili iliyopita, michezo yake yote dhidi ya Yanga ilimalizika kwa matokeo ya sare
Ushindi pekee waliopata Yanga ni kwenye michuano ya kombe la FA msimu wa 2018/19 wakishinda bao 1-0, bao la Heritier Makambo
Nabi ataingia katika mchezo huo akikumbuka matokeo ya msimu uliopita walipolazimishwa suluhu ya bila kufungana katika mchezo ambao bao la Yacouba Songne lilikataliwa na mwamuzi msaidizi aliyefungiwa baada ya mchezo huo
Yanga imeweka malengo makubwa ambapo Wananchi wanautaka ubingwa wa ligi kuu walioupoteza kwa msimu minne mfululizo kwa watani zao Simba
