Mshambuliaji wa Yanga Heritier Makambo ameapa kutumia kipindi hiki cha mapumziko ya michuano ya Kimataifa kujiimarisha ili kuhakikisha anarejea kwenye kikosi cha kwanza
Makambo amekuwa na wakati mgumu kupata nafasi ya kuanza mbele ya Mcongomani mwenzake Fiston Mayele ambaye ni 'wa moto' kwelikweli
Mshambuliaji huyo kipenzi cha mashabiki wa Yanga amefichua kuwa alifanya kikao na kocha Nasreddine Nabi ambapo amesema mazungumzo hayo yamemuongezea ari
"Ligi iliposimama nimepata nafasi ya kuongea na kocha pamoja na viongozi na kuna mambo tumezungumza ambayo rasmi yamenirudisha akili yangu katika soka na kufanya kile ambacho kinahitajika"
"Nimeanza mazoezi yangu binafsi katika wakati huu kabla ya yale ya timu ili kuimarika zaidi na tutakapokwenda mazoezini nitafanya vitu vilivyokuwa bora kwa kutimiza majukumu yangu pengine zaidi ya wakati wote," alisema Makambo
Makambo hakujumuishwa kwenye kikosi cha kwanza katika michezo miwili iliyopita dhidi ya Azam Fc na Ruvu Shooting kutokana na kanuni inayoelekeza wachezaji nane wa kigeni kutumika katika mchezo mmoja
Saido Ntibazonkiza, Mukoko Tonombe na Makambo wamekuwa wakibadilishana nafasi ya kuingia kwenye kikosi cha mechi
