Msemaji klabu ya Yanga Haji Manara amewaambia wale wanaodhani kuwa kasi waliyoanza nayo msimu huu itapoa, watasubiri sana kwani wamejipanga kufunga hesabu katika mbio za ubingwa mapema
Akizungumza katika Mkutano na Wanahabari mapema leo, Manara alisema ameyasikia maneno ya watu wanaofananisha mafanikio ya Yanga kwenye duru ya kwanza msimu uliopita na walivyoanza msimu huu
"Kuna watu wanasema hata msimu uliopita tulianza hivi hivi lakini tukapoteza nguvu kwenye duru ya pili, msimu huu wasitarajie hilo"
"Sisi tunaamini huu ndio wakati wetu wa kufunga hesabu katika mbio za ubingwa hatusubiri mpaka michezo ya mwisho. Tumejipanga kwelikweli na tutahakikisha tunakamilisha malengo," alisema Manara
Akizungumzia mchezo unaofuata dhidi ya Ruvu Shooting ambao utapigwa kesho katika uwanja wa Benjamin Mkapa, Manara amesema wanawaheshimu Ruvu Shooting, ni timu nzuri ambayo pia ina kocha mzuri, Charles Boniface Mkwasa ambaye anaifahamu vizuri Yanga
"Tunawaheshimu Ruvu Shooting, ni timu nzuri yenye wachezaji wazuri na kocha Mkwasa anayeifahamu vyema Yanga. Lakini msimu huu tuna jambo letu, tunazihitaji alama zote tatu ili tuweze kufikisha pointi 15"
