Msimu wa 2018/19 aliyekuwa Kocha Mkuu wa Yanga Mwinyi Zahera ambaye kwa sasa ni Mkurugenzi wa Maendeleo ya soka la Vijana, aliwahi kusema kuwa kuna timu zilikuwa zikiahidiwa fedha pale zilipoifunga au hata kutoka sare na Yanga
Zahera alibainisha kuwa taarifa hizo walikuwa wakipewa na watu wa ndani wa timu husika wenye mapenzi na Yanga
Hakuna kiongozi wa Yanga aliyelalamikia jambo hilo hata pale Mkuu wa mkoa wa zamani wa Dar es salaam Paulo Makonda alipowazawadia KMC Tsh Milioni 20 baada ya kuifunga Yanga
Kimsingi sio kosa mtu kuahidi kutoa fedha kwa timu anayoipenda kama itapata ushindi au hata kutoka sare
Hii inaitwa hamasa, kwa Yanga na Simba hili ni jambo la kawaida. Mo amekuwa akitoa fedha kwa wachezaji wa Simba kila wanapofanya vizuri katika mechi zao na ni hivyohivyo kwa GSM pale Yanga inapofanya vizuri
Sasa inakuwaje kuna watu wanalalamika pale Mkuu wa mkoa wa Mara alipotoa ahadi kuwapa fedha Biashara United kama wangeshinda au kutoka sare dhidi ya Simba?
Kuna kosa gani kama mlezi wa Dodoma Jiji atatoa ahadi kwa timu yake kama itashinda au hata kutoka sare?
Ahadi hizi zina tofauti gani na zile zinazotolewa na mabosi wa Yanga na Simba kwa timu zao zinaposhinda?
Hao wanaolalamika hawazitendei haki hizi timu nyingine, wao wanafanya lakini wakifanya wenzao wanaona ni tatizo
Kimsingi hili ni jambo zuri kwa sababu lina manufaa ya moja kwa moja kwa wachezaji pale wanapotimiza ahadi
Timu zijipange, zicheze mpira uwanjani, kulalamika ni dalili ya kushindwa
Miaka ya nyuma Yanga ilikuwa kinara wa kulalamika kutotendewa haki katika mambo mengi lakini msimu huu Wananchi wamesema kulalamika sasa basi
Mpira uchezwe uwanjani huku Mamlaka za usimamizi wa soka zikihakikisha zinatimiza wajibu wao
