Juzi DTB inayoshiriki ligi daraja la kwanza, ilicheza mechi ya kirafiki dhidi ya Yanga, mchezo ukipigwa Avic Town, Kigamboni
Yanga iliweza kuibuka na ushindi wa mabao 3-1, wafungaji wa mabao ya Yanga wakiwa Fiston Mayele, Yusufu Athumani na Bryson David
Ulikuwa mchezo wa pili DTB inaumana na Yanga na matokeo yakiwa sawa katika michezo yote miwili, Mayele akifunga katika kila mchezo
Kocha Mkuu wa DTB Ramadhan Nsanzurwimo amemtaja mshambuliaji Fiston Mayele kuwa mchezaji hatari ambaye ataisaidia sana Yanga msimu huu
Nsanzurwimo amesema mashabiki wa Yanga watarajie makubwa kutoka kwa Mcongomani huyo lakini timu pinzani zijipange kwelikweli kukabiliana nae
"Nimekiangalia kikosi cha Yanga na nawaambia mashabiki wa timu hiyo watarajie makubwa sana kwa mshambuliaji wao mpya, Fiston Mayele kwani kwa jinsi alivyo wapinzani wajipange"
"Nimemshuhudia Mayele akiisaidia Yanga kwenye mechi za kirafiki tulizocheza na Yanga, nawatahadharisha timu nyingine za ligi Kuu Bara msimu huu"
"Mayele ni mchezaji msumbufu sana na anayeweza kucheza kwa nafasi, unaweza usione madhara yake lakini anajua kucheza na akili za mabeki," alisema Nsanzurwimo
Mayele ameifungia Yanga mabao manne katika michezo yote ya kirafiki iliyofanyika Avic Town
Hakutumika katika mechi za ligi ya mabingwa kwa kuwa ITC yake ilifika Yanga nje ya muda wa usajili wa dirisha la CAF
Yanga itamtumia Mayele katika michuano yote ya ndani ikiwemo Ngao ya Jamii, Ligi Kuu, Kombe la FA, Kombe la Mapinduzi n.k
