Usajili wa kiungo Khalid Aucho umeongeza ushindani katika eneo la kiungo ndani ya kikosi cha Yanga
Msimu uliopita katika eneo hilo, Kocha Nasreddine Nabi aliwategemea zaidi Mukoko Tonombe, Zawadi Mauya na Feisal Salum 'Fei Toto'
Wakati Nabi akimbadilishia majukumu Feisal kwa kumsogeza eneo la ushambuliaji, ushindani utakuwa mkubwa kati ya viungo wakabaji Mauya, Mukoko na Aucho
Kwani kati yao, ni wawili tu watakaokuwa wakianza kwenye kikosi cha kwanza kwa kuzingatia aina ya mfumo ambao Nabi hupendelea kuutumia
Viungo hao wote wameitwa timu za Taifa, Mauya akiwa kwenye kambi ya Taifa Stars, Mukoko anaelekea DR Congo na Aucho yuko Uganda
Katika moja ya mahojiano yake wakati Yanga ikiwa kambini Morocco, Mukoko alisema msimu ujao ushindani utakuwa mkubwa kwani hakuna mchezaji atakayekuwa na uhakika wa namba
"Msimu uliopita kuna nafasi ilikuwa ikifahamika anacheza nani na mtu huyo anapokosekana inakuwa ni tatizo. Lakini msimu huu jambo hilo halitakuwepo. Wachezaji waliosajiliwa wote ni wazuri na kwa kweli hakutakuwa na mchezaji mwenye uhakika wa namba, kocha tu ndio ataamua," alisema Mukoko
Jambo hilo lilidhihiri kule Morocco kwani wachezaji walikuwa wakijituma kwelikweli mazoezini kila mmoja akipambana kumshawishi Nabi
