Kocha wa Yanga Razak Siwa amesema kumekuwa na changamoto ya waamuzi kwenye michuano ya kombe la Kagame inyaoendelea jijini Dar es salaam
Juzi baada ya mchezo kati ya Yanga dhidi ya Atlabara ambao ulimalizika kwa timu hizo kutoka suluhu ya bila kufungana, Siwa alieleza masikitiko yake kwa waamuzi kushindwa kutafsiri vyema sheria 17 za mchezo wa soka
"Timu yangu ilicheza vizuri lakini sikufurahishwa na maamuzi ya mwamuzi sababu ametunyima penalti za wazi kabisa, hili si jambo zuri sababu klabu imetumia gharama kubwa kuiandaa timu halafu mtu mmoja anakwenda kufanya vitu vya hivyo," alisema Siwa
Mkufunzi huyo wa makipa amesema katika mchezo wao wa ufunguzi mambo kama hayo yalitokea, lakini wakachukulia kama ni makosa ya kibinadamu, lakini ameshangazwa kuona jambo hilo likajitokeza tena kwenye mchezo wao wa pili.
Siwa amesema Yanga inaona fahari kushiriki michuano hiyo, lakini ipo haja ya waandaaji Cecafa kuwa makini katika uteuzi wa waamuzi wanaochezesha michuano hiyo ili kuondoa malalamiko ambayo yanaharibu maana halisi ya michuano hiyo
Yanga itashuka dimbani kesho Jumamosi kukamilisha hatua ya makundi kwa kuikabili Express katika mchezo ambao Yanga inahitaji ushindi ili kutinga nusu fainali
