Kocha Mkuu wa Yanga Nasreddine Nabi, jana alikiongoza kikosi cha mabingwa hao wa kihistoria kupata ushindi wa mabao 2-0 dhidi ya JKT Tanzania katika mchezo uliopigwa uwanja wa Jamhuri mkoani Dodoma
Mabao ya Yacouba Songne na Tuisila Kisinda, yalitosha kuihakikishia Yanga alama tatu muhimu ambazo zinawafanya wafikishe alama 61 wakitofautiana mabao tu na watani zao Simba
Huo ulikuwa mchezo wa nne kwa kocha Nabi ambaye alikabidhiwa mikoba ya kukinoa kikosi cha Yanga mwezi uliopita
Ni ushindi wake wa pili, ukiwa wa kwanza kwenye ligi, mchezo mwingine alioshinda ni kombe la FA dhidi ya Tanzania Prisons
Pengine ulistahili kuwa ushindi wake wa tatu kama sio zile figisu za waamuzi zilizofanywa kule Ruangwa katika mchezo dhidi ya Namungo Fc
Yapo maboresho yanayoonekana kwenye kikosi cha Yanga chini yake, vijana wanashambulia kwa kasi, wanatengeneza nafasi na hata kwenye kujilinda umakini umeongezeka
Wakati anakabidhiwa majukumu, Nabi aliahidi kuwa ataifanya Yanga kuwa moja ya timu bora barani Afrika, anachohitaji ni muda wa kuifanya kazi hiyo
Taratibu timu imeoanza kuonyesha utofauti, ile ari na upambanaji waliokuwa nao wachezaji kwenye duru ya kwanza imeanza kuonekana tena
