Mkufunzi wa magolikipa Yanga, Razak Siwa, amemtetea golikipa wake, Faroukh Shikalo kuwa bao alilofungwa katika mechi ya Ligi Kuu Tanzania Bara dhidi ya Azam Fc halitokani na uzembe bali ni uwezo binafsi na ujuzi wa mshambuliaji wa Azam FC, Prince Dube
Siwa amebainisha kuwa hawezi kumtupia lawama Shikalo kwa sababu mfungaji alitumia ufundi na ujuzi mkubwa wa kupiga mpira wa mbali na kuipa timu yake ushindi.
"Mpigaji alitumia ujuzi na alitumia akili ya kufunga, kufungwa haikuwa uzembe wa kipa wetu kwa sababu hata sisi tuliweza kupata nafasi waliyopata Azam FC kwa kupiga shuti la mbali na kushindwa kutumia vizuri nafasi,".
"Tulitengeneza nafasi nyingi hatukuweza kutumia kwa sababu hatukuwa watulivu ila wenzetu walipata walikuwa makini na utulivu mkubwa wa kupata ushindi huo," alisema Siwa.
Aliongeza baada ya matokeo mabaya waliyopata juzi, wanaenda kufanyia kazi upungufu wote uliojitokeza kwenye mechi hiyo kwa ajili ya kuwa imara kuelekea mchezo wao unaofuata wa Kombe la FA dhidi ya Tanzania Prisons ambao utachezwa Ijumaa kwenye Uwanja wa Nelson Mandela mjini Sumbawanga.
Yanga tayari imeondoka jijini Dar es salaam wakielekea mkoani Rukwa kwa kupitia Mbeya
