Ni siku nyingine kocha Juma Mwambusi atahitaji kuchanga karata zake vyema ili kuhakikisha Yanga inaondoka na alama zote tatu leo katika mchezo wa ligi kuu dhidi ya Biashara United
Yanga ilifanikiwa kuibuka na ushindi wa bao 1-0 katika mchezo wa kwanza uliozikutanisha timu hizo kule Musoma
Wananchi wanapaswa kurudia kile walichokifanya Musoma, kuweza kuwafunga Biashara Unite ambao pia katika mechi za karibuni wana 'struggle' baada ya kocha Francis Baraza kutimkia Mtibwa Sugar
Bila shaka leo Mwambusi atafanya mabadiliko katika kikosi kilichoanza mchezo uliopita dhidi ya KMC na kulazimishwa sare ya bao 1-1
Wachezaji Michael Sarpong, Carlinhos, Haruna Niyonzima, Farid Mussa na Bakari Nondo Mwamnyeto hawakuwa sehemu ya kikosi kutokana na sababu mbalimbali
Leo upo uwezekano mkubwa Mwambusi anaweza kuwatumia kutegemea na mahitaji ya mchezo
Bado safu ya ushambuliaji haijaleta matunda pamoja na mabadiliko ya mara kwa mara
Kurejea kwa Carlinhos pamoja uwepo wa Saido Ntibazonkiza pengine unaweza kuleta mabadiliko katika eneo la ushambuliaji
Deus Kaseke ndiye kinara wa ufungaji kwenye kikosi cha Yanga akiwa ameweka kambani mabao sita
Huu ni mchezo ambao Mwambusi hapaswi kumuacha nje. Mikimbio ya Kaseke imekuwa na faida kubwa kwa Yanga pengine kuliko hata ile ya washambuliaji asili
Ni mchezo ambao mabadiliko makubwa ya kikosi yanatarajiwa kuonekana zaidi katika eneo la kushambulia
Beki Abdallah Shaibu Ninja alifanya vizuri katika mchezo uliopita dhidi ya KMC
Pengine Mwambusi anaweza kumuamini tena leo akianza na nahodha Lamine Moro
Mlinda lango Farouk Shikhalo anatarajiwa kuanza wakati huu ambao Metacha yuko katika majonzi ya kumpoteza mtoto wake mapema wiki hii
Kibwana Shomari na Adeyum Saleh nao huenda wakaendelea na majukumu yao kama mchezo uliopita
Hakuna shaka na nafasi za Mukoko Tonombe na Feisal Salum, kwani wamekuwa na ushirikiano mzuri katika eneo la kiungo
Katika mkutano wa Wanahabari jana kuelekea mchezo wa leo, Mwambusi alisema watacheza soka la kushambulia zaidi
Hata hivyo atapaswa kuchukua tahadhari katika ulinzi pia ili kuhakikisha yaliyojitokeza katika mchezo dhidi ya KMC hayajirudii
Katika mchezo huo Yanga ilikuwa ikiacha nafasi kubwa eneo la kati pale ilipokwenda kushambulia
Bryson David aliifungia KMC bao baada ya kukokota mpira kutoka umbali wa takribani mita 40 kabla ya kuachia shuti lililomshinda Shikhalo
Mwambusi anaweza kuwahitaji wachezaji aina ya Ditram Nchimbi ambao wanakuwa msaada mkubwa timu inapozuia kuanzia kwa wapinzani
