Haji Mwinyi au Gadiel Michael?

Michuano ya Chalenji imemalizika jana nchini Kenya kwa Harambee Stars, wenyeji wa michuano hiyo kuibuka mabingwa baada ya kuichapa Zanzibar Heroes kwa mikwaju ya penati 3-2.

Hiyo ni baada ya sare ya mabao 2-2 katika dakika 120.

Lakini mjadala mkubwa umeibuka baina ya mashabiki wa Yanga baada ya kuvutiwa na kiwango alichoonyesha Haji Mwinyi Mngwali mlinzi wa kushoto wa Yanga na Zanzibar Heroes kwenye michuano hiyo.

Mwinyi alikuwa mchezaji muhimu katika kikosi cha Zanzibar Heroes na ndiye aliyepika bao la kwanza la kusawazisha la Zanzibar Heroes jana.

Wakati akielekea visiwani Zanzibar kujiunga na wenzake kabla ya safari ya Kenya, Mwinyi aliahidi kutumia michuano hiyo ya CECAFA Senior Challenge Cup kulishawishi benchi la Ufundi la Yanga kumpa nafasi.

Na hakika amefanikiwa kwa kiasi kikubwa kwani kiwango chake katika michuano hiyo kimetukumbusha Mwinyi Haji wa miaka miwili iliyopita.

Bila shaka benchi la ufundi limemuona, na ni swala la muda tu tutaanza kumuona tena akisaidiana na Gadiel Michael kule upande wa kushoto.

Tofauti pekee ya wawili hawa ni kwamba Mwinyi Haji ni mzuri sana katika ushambuliaji kutokea pembeni.

Krosi zake ni maridadi sana na katika michuano ya Chalenji tumemuona ameimarika sana hata katika ukabaji.

Wakati Gadiel Michael ni jembe hasa la kazi.

Faida kubwa ya Gadiel Michael ni uwezo wake wa kukaba na kushambulia bila kuchoka.

Uwepo wao wote ni faida kwa Yanga.

Bila shaka wakati huu ambao Yanga inakabiliwa na michuano mingi, mabeki hao watatumika wote.

Kwani italilazimu benchi la ufundi kubadili kikosi kwenye baadhi ya michezo ili kuwaweka wachezaji wote fiti kadiri inavyowezekana.