Shirikisho la Mpira wa Miguu Tanzania (TFF) limetangaza kuwa hafla ya utoaji wa Tuzo za TFF kwa msimu wa 2025/26 inatarajiwa kufanyika Desemba 12, 2026, jijini Arusha.
Kwa mujibu wa taarifa ya TFF, tuzo hizo zitagawanywa katika makundi matano makuu ambayo ni Tuzo za Ligi Kuu ya NBC, Kombe la Shirikisho la CRDB, Ligi Kuu ya Wanawake, Ligi Nyingine pamoja na Tuzo za Utawala. Jumla ya kategoria 38 zinatarajiwa kutolewa, huku washindi 61 wakipatiwa tuzo katika maeneo mbalimbali ya soka nchini.
Katika msimu huu, TFF imeongeza kategoria mpya tatu ambazo ni Tuzo ya Mtanzania Bora Anayecheza Nje kwa upande wa wanaume, Mtanzania Bora Anayecheza Nje kwa wanawake na Kikundi Bora cha Ushangiliaji Uwanjani.
Kuongezwa kwa kategoria hizo kunalenga kupanua wigo wa kutambua mafanikio ya Watanzania wanaocheza soka nje ya nchi, sambamba na kuthamini mchango wa mashabiki katika kuhamasisha na kuunga mkono timu zao.
Hafla hiyo inatarajiwa kukutanisha wadau mbalimbali wa soka nchini kwa ajili ya kutambua na kuenzi mchango wa wachezaji, makocha, viongozi na wadau wengine waliofanya vizuri katika msimu wa 2025/26.