Simba, Yanga uso kwa uso na miamba wengine 14 makundi CAFCL

Tanzania itawakilishwa na timu mbili, Simba SC na Yanga, katika hatua ya makundi ya Ligi ya Mabingwa Afrika (CAF Champions League), ambapo jumla ya timu 16 zitachuana kuwania ubingwa wa soka la klabu barani Afrika.

Simba na Yanga zimefanikiwa kufuzu hatua hiyo baada ya kufanya vizuri katika michezo yao ya awali, na sasa zinajiandaa kukutana na baadhi ya miamba ya soka barani Afrika katika hatua inayotarajiwa kuwa na ushindani mkubwa.

Simba SC ilihakikisha nafasi yake baada ya kuichapa 15 de Agosto mabao 3-0 katika mchezo wa marudiano uliopigwa Uwanja wa Uhuru jijini Dar es Salaam. Ushindi huo uliifanya Simba kusonga mbele kwa jumla ya mabao 9-1, kufuatia ushindi wa mabao 6-1 katika mchezo wa kwanza.

Kwa upande wa Yanga, waliiondosha CFFA kwa ushindi wa jumla wa mabao 8-1 wakishinda 4-0 na 4-1 katika mechi mbili za kuwania tiketi

Shirikisho la Soka Afrika (CAF) limepanga kufanya droo ya hatua ya makundi Jumatano, Oktoba 28, 2026, jijini Cairo, Misri, kuanzia saa nane mchana.

Hatua hii inazikutanisha timu 16 zilizofuzu, ambazo zitagawanywa katika makundi manne yenye timu nne kila moja. Kila kundi litakuwa na ushindani wa kipekee huku timu zikisaka nafasi ya kusonga mbele katika mashindano hayo.

Kwa mujibu wa orodha ya vyungu iliyotolewa, Simba na Yanga zimewekwa katika Chungu cha Pili (Pot 2), jambo linalomaanisha kuwa timu hizo haziwezi kupangwa kundi moja endapo utaratibu huo utatumika katika droo.

Timu nyingine zitakazoshiriki hatua hii ni Esperance de Tunis na RS Berkane, pamoja na Zamalek SC na Pyramids FC, ambazo zimewekwa katika Chungu cha Kwanza. Timu hizo zinatarajiwa kuwa miongoni mwa wapinzani wenye ushindani mkubwa katika mbio za kuwania taji.