Kaimu Ofisa Habari wa Bodi ya Ligi Kuu Tanzania (TPLB), Yahya Abushehe, amesema mfumo wa ununuzi wa tiketi kwa mchezo wa Simba dhidi ya Young Africans upo tayari na mashabiki wanaweza kuanza kununua tiketi.
Abushehe amesema awali kulikuwa na maboresho yaliyofanywa kwenye mfumo huo, ambapo wanunuzi walihitajika kuwa na barua pepe (email), huku baadhi ya watu wasio na vifaa vya simu vinavyotumia internet wakishindwa kununua tiketi.
Amesema wamebaini kuwa maboresho hayo yanaweza kuchukua muda mrefu kukamilika, hivyo wameamua kuyasitisha kwa muda na kurejea kwenye utaratibu wa awali wa ununuzi wa tiketi.
Hatua hiyo imekuja kuelekea mchezo wa Kariakoo Derby kati ya Simba na Young Africans, huku mashabiki wakipewa fursa ya kununua tiketi kupitia mfumo uliorejeshwa kwenye utaratibu wa awali.
