Nahodha wa FC Barcelona, Raphinha, amempa sifa kubwa kocha Hansi Flick, akieleza kuwa kocha huyo amekuwa na mchango mkubwa katika kubadilisha mtazamo wake kuhusu soka na maisha yake kwa ujumla ndani na nje ya uwanja.
Raphinha amesema imani aliyopewa na Flick tangu alipowasili Barcelona mwaka 2024 ilikuwa moja ya sababu kubwa zilizomsaidia kurejesha kujiamini na kuongeza kiwango chake. Mbrazil huyo pia amefichua kuwa kabla ya Flick kuwasili, alikuwa tayari amefikiria kuondoka Barcelona kutokana na hali aliyokuwa akiipitia chini ya kocha wa wakati huo, Xavi Hernandez
. “Hansi Flick ndiye kocha aliyebadilisha maisha yangu. Nitasema hivi kila wakati. Yeye ndiye mtu aliyebadilisha mtazamo wangu, hapa klabuni na hata kama mtu binafsi. Kocha anapokupa imani, huhitaji maneno mengi. Mara moja nilihisi kwamba aliniamini kikamilifu,” alisema Raphinha.
Chini ya Flick, Raphinha amekuwa mmoja wa wachezaji muhimu katika kikosi cha Barcelona, huku akifanya vizuri zaidi katika safu ya ushambuliaji. Mbali na kutumika katika nafasi yake ya kawaida ya winga, amekuwa akitumika pia katika maeneo ya juu zaidi ya uwanja, jambo lililomsaidia kuongeza mchango wake katika kufunga na kutengeneza mabao.
Uhusiano huo kati ya Raphinha na Flick umeendelea kuwa sehemu muhimu ya mafanikio ya mchezaji huyo katika kipindi chake cha Barcelona, huku imani ya kocha ikiwa miongoni mwa mambo ambayo Raphinha mwenyewe ameyataja kuwa na mchango mkubwa katika mabadiliko yake.
