Waziri wa Habari, Utamaduni, Sanaa na Michezo, Paul Makonda, amewataka viongozi wa vilabu vya soka nchini kutatua migogoro yao kupitia vikao na mifumo ya ndani ya taasisi zao, ili kuepusha dhana kwamba Serikali inaingilia masuala ya uendeshaji wa vilabu.
Makonda ameyasema hayo Septemba 24, 2026, jijini Dar es Salaam, wakati akizungumza na waandishi wa habari kuhusu maandalizi ya AFCON 2027 na Miss World 2027. Amesema viongozi wa vilabu wanapaswa kujenga utamaduni wa kukaa pamoja, kusikilizana na kutafuta suluhu wanapokutana na changamoto.
Amesisitiza kuwa Serikali haipaswi kuhusishwa katika kila mgogoro unaojitokeza ndani ya vilabu, hasa pale ambapo suala husika linaweza kutatuliwa na viongozi pamoja na wadau wa taasisi hiyo kupitia mazungumzo na taratibu zilizopo.
Kwa mujibu wa Makonda, viongozi wa vilabu wanapaswa kuweka msingi wa maelewano na kutumia mifumo yao ya ndani kutatua tofauti, huku Serikali ikiingilia pale tu ambapo kuna ulazima wa kisheria au wa kiutendaji.
