Waziri wa Habari, Utamaduni, Sanaa na Michezo, Paul Makonda, amesema Timu ya Taifa ya Tanzania ni mali ya nchi na si kampuni ya mtu binafsi.
Akizungumza leo jijini Dar es Salaam, Makonda amesema mamlaka ya Waziri katika kusimamia sekta ya michezo yapo kwa mujibu wa Sheria, Sera na Kanuni, akisisitiza kuwa Timu ya Taifa inawakilisha nchi kila inapokwenda.
“Timu ya Taifa ni mali ya Nchi, sio kampuni ya Mtu, ndiyo maana tumeikasimu na kuihudumia, timu ikienda popote pale, ni Nchi inaenda,” amesema Makonda.
Makonda pia amesema Waziri anayesimamia sekta hiyo ni mteule wa Rais, hivyo mamlaka yake yanapaswa kuheshimiwa katika utekelezaji wa majukumu yake ya kuisimamia sekta ya michezo.
“Wanamfanya kama Waziri wanamdharau, lakini huyo ni mteule wa Rais anayesimamia wizara ambayo inakupa mkate,” amesema Makonda.
Kauli hiyo ameitoa wakati akizungumza kuhusu masuala mbalimbali yanayohusu sekta ya michezo na uendeshaji wa Timu ya Taifa nchini.
